「老闆娘，條裙幾錢呀?」
「呢件韓國貸黎架，D料好好著，400蚊啦。」
「嘩，400蚊貴左D喎，呢排經濟唔好，平D啦。」
「唉，姐姐仔，你都識講經濟唔好啦，我地呢D小生意，賺你幾十蚊架咋...你摸下D料先，試上身睇下!抵著架!」
「睇落我都真係幾中意既，不過真係太貴喇...」
「你睇下!隻色著到你又白，又高又廋!好襯你架，我唔係講笑哄你架。最好就係，你睇...」拎出一本雜誌，「同呢款名牌既裙係咪好似呢...」
「又幾好喎好似...」
「姐姐仔，400蚊，真係唔貴。你行下成個商場丫，仲邊有第二間好似我呢間有D咁抵又咁靚既貨丫?」
「都係唔好喇，街口有間有條差唔多既，雖然係大陸野，不過平成半，我都係唔要喇。」
「喂，姐姐仔!」
姐姐仔緩步行出舖頭。
「唉，好喇，見係你，350喇，我去到盡嫁喇!」
姐姐仔背住老闆娘狡猾地笑左一笑，拎轉身，擺出委屈既樣，扮晒愛不惜手咁摸下條裙。
「雖然我真係好鍾意條裙，但係我真係覺得太貴喇...」
雖然距離來貨價仲有一太段距離，但係老闆娘決定唔會屈服，改行可憐路線。
「姐姐仔，睇你身光頸靚，350蚊既裙你一定著得起既。何況番工都要裝身嫁!你唔似我地呢D小本生意呀...噏到口水都乾先一單生意架咋，養起成頭家架。」
姐姐仔見形勢有變，都打算就此投降，但係投降之前心諗行埋最後一著。
「唔，咁呀...」拎出銀包，「350就350啦...」拎出半張500蚊紙，又欲言又止。
老闆娘見半張銀紙浮左出面，緊張得一額汗，馬上加把勁。
「咁就好喇!拿拿拿，送多條皮帶過你，350抵到爛!」
半塊面既銀紙又被姐姐仔放番入銀包。
「算啦老闆娘...唔好意思...其實街口個條都OKAY架...」轉身就走!
可惡!死0靚妹!玩得甘盡!念在今日未開齋，算你好彩!
「好喇好喇好喇!300喇!」
「250。」
「唔係掛，290喇!」
「270。」
「姐姐仔，唔係掛!」
又出轉身一招。
「怕左你喇!270就270啦!」
姐姐仔大獲全勝。
老闆娘將條裙拿拿林放入膠袋，唔捨得地找番30蚊比一臉笑容既姐姐仔。
就係咁，姐姐仔既討價還價功力又深左一倍。
